Qardaşının öldürüb basdırdığı deyilən qız tapıldı

15-01-2016, 12:04
129

Qardaşının öldürüb basdırdığı deyilən qız tapıldıTovuzda qardaşı tərəfindən öldürülüb kənd qəbiristanlığında basıdırıldığı iddia edilən Zülfiyyə Məhərrəmova tapılıb.

Tovuz Rayon Polis İdarəsindən  verilən məlumata görə, rayon polis şöbəsi əməkdaşlarının keçirdikləri əməliyyat tədbirləri nəticəsində Zülfiyyə Məhərrəmovanın elə yaşadığı evin yaxınlığındakı qonşunun evində gizləndiyi məlum olub: "Əməkdaşlarımız hazırda hadisə yerindədir. Səhər saatlarında qonşulardan biri 21 yaşlı Zülfiyyənin başqa bir qonşularının evində gizləndiyini görüb. Dərhal əraziyə baxış keçirən əməkdaşlarımız Z. Məhrrəmovanı aşkarlayaraq ailəsinə təhvil veriblər".

Şöbədən onu da bildirdilər ki, qız sarsıntı keçirdiyi üçün hazırda ona sistem qoşulub və ifadə verə bilmir. "Yaxın saatlarda o, müayinə üçün Tovuz Rayon Mərkəzi Xəstəxanasına aparılacaq. Ancaq hələlik qızın ilkin ifadəsi alınmadığı üçün onun hansı səbəbdən bu yola əl atdığı bilinmir", -deyə şöbədən bildirdilər.

1995-ci il təvəllüdlü Zülfiyyə Məhərrəmovanın itkin düşməsində şübhəli şəxs qismində saxlanan qardaşı 17 yaşlı Anar Səmədov sərbəst buraxılıb.

Faktla bağlı Tovuz Rayon Polis Şöbəsində araşdırmalar davam etdirilir.

Xatırladaq ki, yanvarın 13-də KİV-də Tovuz rayonunun Əyyublu kənd sakini, itkin düşən 21 yaşlı Zülfiyyə Məhərrəmovanın öldürülməsi barədə məlumat yayılıb.

Məlumata görə, Z.Məhərrəmovanın kiçik qardaşı Anar şübhəli şəxs qismində saxlanılaraq Tovuz rayon Polis şöbəsinə aparılıb. İlkin ifadəsində qardaşı bacısını öldürərək yaxınlıqdakı qəbiristanlıqda basdırdığını bildirib.
Hazırda qardaşın ifadəsi ilə əlaqədar istintaq tədbirləri davam etdirilir. Kənd sakinləri isə Anarın qətli tək törətmədiyini bildiriblər.

Ötən gün isə Tovuz Rayon Polis İdarəsindən  bildirmişdilər ki, 1995-ci il təvəllüdlü Zülfiyyə Nizami qızı Məhərrəmovanın qardaşı tərəfindən öldürülməsi faktı dəqiq və yoxlanmış məlumat deyil: "Bəzi kütləvi informasiya vasitələri məlumat yayıblar ki, 21 yaşlı qız qardaşı tərəfindən öldürülüb və yaxınlıqdakı qəbiristanlıqda basdırılıb. Bu məlumatlar həqiqətə uyğun deyil".

  //ANS Press